Morðingi RFK fær hugsanlega reynslulausn og Stefan Löfven hættir

Rúm fimmtíu ár eru liðin frá því að Sirhan Sirhan, þá ungur maður, skaut Robert F. Kennedy, öldungadeildarþingmann og forsetaefni Demókrata, til bana á Ambassador-hótelinu í Los Angeles. Sirhan hefur setið inni síðan en þó ekki mótbárulaust. Hann hefur sextán sinnum óskað eftir reynslulausn og nú gæti honum orðið að ósk sinni. Á föstudaginn samþykkti nefnd sem úrskurðar um reynslulausn fanga í Kaliforníu að Sirhan, morðingi Kennedy, ætti rétt á reynslulausn. Tvö börn Kennedys styðja reynslulausnina. Sex systkinanna eru á móti því að hann verði látinn laus. Að endingu verður það svo Gavin Newsom, ríkisstjóri Kaliforníu sem ákvarðar hvað gerist næst. Við rifjum upp málið og þessar nýjustu vendingar í fyrri hluta Hádegisins. Stefan Löfven, forsætisráðherra Svíþjóðar og formaður Jafnaðarmannaflokksins, tilkynnti nýlega að hann hygðist láta af störfum. Í Svíþjóð er talað um að Löfven hafi níu líf - maðurinn sem hefur haldið forsætisráðherraembættinu í gegnum ófáar krísur, á sama tíma og fylgi við flokk hans dalar og dalar. En hver er þessi maður - sem enginn kann illa við en fáir dást að? Hver er arfleið hans og hvaða áhrif hefur brotthvarf hans á sænsk stjórnmál? Við fáum Kára Gylfason í Gautaborg til að fara yfir það í seinni hluta Hádegisins. Hádegið er fréttaþáttur sem er á dagskrá alla virka frá 12 til 13 í umsjón Guðmundar Björns Þorbjörnssonar og Katrínar Ásmundsdóttur.